Van Friedrich-Wilhelm Graue ut Woterstrote
Moin leibe Plattdüütschfrünne!
Dei angespannte Loge in Düütschland un dei Welt hat mie up düsset Themo e brocht. Ick läse jeden Dach dei Zeitung, kieke gerne dei Dogesschau un während dessen loppt dat Weltgescheen wie sau ein Sciene-Fiction-Film aff. Miene grote Sorge is, wo schöelt use Kinna un Enkelkinna anne hochkieken, wenn nich an goe Vörbiller? Dat fangt inne Familien an. Öllern trennt sick fooken, dei Kinna bliebet uppe Strecke, dei Grünne sind veelfältich. Sau manche Politika hangt anne Macht, besonners, wenn hei scheibe Kaije e dreben hat. Ick bin kein Politika, mehr ein mündiger Bürger för dääne wählen goen Pflichprogramm is. Ick weit, wo dei Demokrotie mit Fäuten e träen werd, doa stoet dei Lüe stün`n un Doge an, ümme för bätere Verhälthisse tau stimmen. Foken utebeutet un ünna Lebensgefohr! Mie faalt dor Länna in Ofriko in.
Vör körten leip eis wer dei Film inne Flimmerkiste ober Mahatma Gandhi, in dei Paraderulln Ben Kingsley. Un et woad noch eis wer düütlich, mit weckke Obermacht Indien ünnerjocht woad.. Dei passive Widerstand un siene Folgen, dat hat mie freuer al begeistert. Dr. Martin Luther King, dei in Ameriko för Minsgenrechte kämpfede, möste dat 1968 mit dään Leben betolen. Südofriko woad lange van Witte regiert un dei Schwaaten ünnadrücket. Besünners gegen dei Apartheit kämpfede Nelsen Mandela un woad tau 27 Joahre in dat Strofloga up dei Insel Robben Eyland verbannt. Un is anschliessend ohne grote Gewalt anerkannter Präsident van Südofriko e woan. Michael Gorbaschow hat mehe dor tau bie drogen, dat Düütschland wer tauhope e kom`m is, momenton kuum vörstellbor.
Ick mot gestoen vör Joahren häbbe ick e dacht, bruket wie dei Bundeswehr überhaupt noch? Seit dään 24.2.2022 mot man dor annasta ober denken. Neutrole Länner, wie Finnland oder Schweden, sind bestrebet in dei Nato tau kom`m. Machtbolten wie Putin moket dään Westen för innenpolitische Probleme verantwortlich. Dat Volk mot et glöben oder werd innesperrt. Erdogan hangt siene Müssen in`n Wind un hoolt dat Beste för sick ruut. Hei drohet Brüssel, dei Syrer ut dei Loger lopen tau loten, ümme Millionen als Faustpfand tau erpressen. Dei kriegerischen Aktionen twüsken Israel un Palestino flammt jümmer wer up. In`n Iran lotet dei Mullahs up eigene Lüe scheit`n. Kim Jon Un, Nord Koreas Machhober, drohet dei Welt mit Atomwaffen. Dei Chinomann ünnerdrücket Minderheiten wie dei Uiguren in Loger un behandelt sei schlecht. Dei jüngste Konflikt mit Taiwan is sicher noch nich tau Enne. Is Chino nich grot genauch? Mie fallt dor blos in: Man kann nich in Freen leben, wenn et dään bösen Nachboan nich gefallt!
Missbruksfälle, besonners in dei Katholischen Kerken un innen Sport nehmt kein Enne. Dei Fälle ligget meist länger trügge. Miene Sorge is, wat is aktuell fandoge mit düsse Banausen? Dei werd et jümmer geben, Strofen schrecket nich aff! Hoolt alle dei Ogen up, wie alle bruket eine bätere Welt.
Dei Sport, un aktuell dei Fautball WM in Kator, is ok politisch e woan. Dubios, wie man up dään Utdrägongsort e kom`m is. Man munkelt, dat sick dei Funktionäre dei Tasken vull e stoppet häbbet. Dei `One Love`Armbinne dräägen, hat sick kein Fautballa e trauet. Dei Irona häbbet dei Nationolhymme nich me`e sungen un wetet nich wat öhr bleiet. Dei Düütschen häbbet sick dei Hand vör dään Mund e holn. Düsse stille Protest weat nich recken, ümme düsset Mullaregime in`n Iran tauen Deubel tau jogen! Wie bruket mehr Lüe mit`n Mors inne Böcksen, ohne Profit- un Machtgier, dei vör eine bätere Welt sorget!
Häbbet alle eine gesegnete Wiehnachtstiet un koomt gesund in`nt Neie Joahr. Munter blieben!
Anzeige 
